1997-yilda Kamoliddin Behzod nomidagi Milliy rassomlik va dizayn instituti tashkil etilgach, uning tarkibida “Amaliy grafika” kafedrasi faoliyat boshlagan. Keyinchalik mazkur kafedra rivojlanib, “Amaliy grafika va badiiy fotografiya” nomi bilan faoliyat yurita boshladi. Bugungi kunda ushbu kafedra respublikamizda noyob yo‘nalishlardan biri bo‘lib, “Reklama va amaliy grafika” hamda “Kompyuter grafikasi va badiiy foto” yo‘nalishlari bo‘yicha yuqori malakali mutaxassislar tayyorlaydigan yetakchi markaz sifatida faoliyat olib bormoqda.

Kafedraning asosiy maqsadi — zamonaviy dizayn yo‘nalishlari, milliy va jahon tajribalarini uyg‘unlashtirgan holda, nazariy bilim va amaliy ko‘nikmalarga ega, ijodiy fikrlaydigan, raqobatbardosh mutaxassislar tayyorlashdan iborat. Shu maqsadda talabalarga reklama va grafika sohasining zamonaviy yo‘nalishlari amaliy misollar asosida o‘rgatiladi, turli loyihalar bilan ishlash orqali dizayn va kompozitsion yechimlar yaratish ko‘nikmalari shakllantiriladi hamda grafik, 3D va raqamli dasturlardan samarali foydalanish malakalari rivojlantiriladi. Shuningdek, kafedra talabalarda estetik didni rivojlantirish, ijodiy yondashuvni shakllantirish va rivojlantirishni o‘z oldiga vazifa qilib qo‘ygan.

Kafedrada quyidagi asosiy fanlar o‘qitiladi: loyihalash asoslari, reklama va amaliy grafika, kompyuter grafikasi, badiiy fotografiya, kompozitsiya va rangshunoslik, materialshunoslik, dizayn grafikasi, dizayn nazariyasi va metodologiyasi, zamonaviy kompyuter dasturlarida loyihalash, vizual kommunikatsiya, maketlash, badiiy konstruksiyalash, media va reklama texnologiyalari.