1999-yilda Kamoliddin Behzod nomidagi Milliy rassomlik va dizayn institutining “Amaliy san’at” fakulteti tarkibida “Dizayn” kafedrasi tashkil etilgan. 2001-yildan boshlab mazkur kafedra tarkibida respublikamizda ilk bor “Libos dizayni” yo‘nalishi bo‘yicha ta’lim yo‘lga qo‘yildi. Keyinchalik ushbu yo‘nalish rivojlanib, bugungi kunda moda dizayni sohasida yuqori malakali mutaxassislar tayyorlaydigan muhim ta’lim markaziga aylandi .

Kafedraning asosiy maqsadi — moda dizayni, milliy va jahon an’analari hamda zamonaviy texnologiyalarni uyg‘unlashtirgan holda, nazariy bilim va amaliy ko‘nikmalarga ega, ijodiy fikrlaydigan, raqobatbardosh mutaxassislar tayyorlashdan iborat. Shu maqsadda talabalarda libos dizayni konsepsiyasini ishlab chiqish, kolleksiya yaratish, material va rang uyg‘unligini tanlash, shuningdek, zamonaviy grafik va raqamli dasturlar asosida dizayn loyihalarini ishlab chiqish ko‘nikmalari shakllantiriladi.

Hozirgi kunda kafedrada bakalavriat va magistratura bosqichlarida kadrlar tayyorlanadi. Ta’lim jarayoni kredit-modul tizimi asosida tashkil etilgan. Kafedrada quyidagi asosiy fanlar o‘qitiladi: libos dizayni, kompozitsiya va rang, dizayn-loyihalash, tikuv buyumlari texnologiyasi, kiyim konstruksiyalash, moda tarixi va zamonaviy uslublar, dizayn metodologiyasi, fashion illyustratsiya, bosh kiyim va aksessuarlar dizayni, kompyuterda loyihalash, kreativ loyihalash, moda marketingi.