1991-yilda A.N. Ostrovskiy nomidagi Toshkent teatr va rassomlik instituti M.Uyg‘ur nomidagi Toshkent davlat san’at instituti deb qayta nomlandi. 1997-yilda mazkur institut tarkibidan rassomlik va dizayn yo‘nalishlari ajratilib, O‘zbekiston Badiiy akademiyasi tasarrufida Kamoliddin Behzod nomidagi Milliy rassomlik va dizayn instituti tashkil etildi. 1999-yilda esa “Arxitektura dekorlarini ta’mirlash va interyerni loyihalash” kafedrasi negizida ikkita mustaqil kafedra — “Dizayn” hamda “Arxitektura yodgorliklarini ta’mirlash” kafedralari tashkil etildi. 2019-yilda “Dizayn” kafedrasi negizida “Dizayn: sanoat dizayni” ta’lim yo‘nalishi ochildi.

Kafedraning asosiy maqsadi — zamonaviy dizayn uslublari hamda milliy va jahon dizayn tajribalarini uyg‘unlashtirgan holda yuqori malakali mutaxassislar tayyorlashdan iborat. Shu maqsadda talabalarga dizaynning zamonaviy yo‘nalishlari amaliy misollar asosida o‘rgatiladi, turli loyihalar bilan ishlash orqali loyihalash ko‘nikmalari shakllantiriladi hamda grafik, 3D va raqamli dasturlardan samarali foydalanish malakalari rivojlantiriladi. Shuningdek, kafedra talabalarda ijodiy fikrlashni rivojlantirish, dizayn yechimlarini ishlab chiqish, estetik didni shakllantirish va topshiriqlarga mas’uliyat bilan yondashish ko‘nikmalarini rivojlantirishni o‘z oldiga vazifa qilib qo‘ygan.

Kafedrada quyidagi asosiy fanlar o‘qitiladi: loyihalash asoslari, interyerni loyihalash, sanoat mahsulotlarini loyihalash, kompozitsiya va rangshunoslik, materialshunoslik, arxitektura va dizayn grafikasi, eksteryer va interyer perspektivasi, arxitektura va interyer tarixi, dizayn nazariyasi va metodologiyasi, qurilish konstruksiyalari, ergonomika, arxitekturaviy loyihalash, dizayn obyektlarini Autodesk dasturlarida loyihalash, BIM texnologiyalari asoslari, badiiy konstruksiyalash, maketlash, muhit dizayni, interyer va eksteryer vizualizatsiyasi, bionika va parametrik dizayn, muhandislik va dizayn loyihasi, modellash va prototiplash, binolarni muhandislik jihozlash hamda smeta.