1965-yilda Teatr va rassomlik institutining Ilmiy kengashi tashabbusi bilan san’atshunoslik ta’lim yo‘nalishi hamda “Tasviriy san’at tarixi va nazariyasi” kafedrasi tashkil etilgan. 2020-yilda institut Kengashi qaroriga asosan kafedra nomi “San’at tarixi va nazariyasi” deb qayta nomlandi.

Bugungi kunda kafedra tasviriy va amaliy san’at, arxitektura hamda dizayn sohalarida ilmiy-nazariy bilimlarni shakllantiruvchi yetakchi ilmiy-ta’lim markaz sifatida faoliyat yuritmoqda. Kafedrada jahon va milliy san’at tarixi, badiiy jarayonlarning rivojlanishi, uslub va oqimlar, estetik nazariyalar hamda san’atshunoslik tahlili masalalari chuqur o‘rganiladi.

Kafedraning asosiy maqsadi — talabalarda san’atga nisbatan chuqur ilmiy-tahliliy tafakkurni shakllantirish, milliy va jahon san’ati rivojlanish qonuniyatlarini anglay oladigan, zamonaviy ilmiy yondashuvlarni egallagan, raqobatbardosh san’atshunos mutaxassislarni tayyorlashdan iborat.

Hozirgi kunda kafedrada bakalavriat va magistratura bosqichlarida kadrlar tayyorlanadi. Ta’lim jarayoni kredit-modul tizimi asosida tashkil etilgan. Kafedrada quyidagi asosiy fanlar o‘qitiladi: qadimgi dunyo san’ati, XX–XXI asr Yevropa va Osiyo san’ati, Sharq san’ati tarixi, O‘zbekiston san’ati tarixi, amaliy bezak san’ati tarixi, o‘zbek xalq amaliy san’ati tarixi, tasviriy san’atning umumiy tarixi, badiiy tanqid tarixi va nazariyasi, Sharq kitoboti va miniatyura san’ati, teatr, kino va musiqa san’ati, san’atshunoslik asoslari, ilmiy tadqiqot asoslari, san’at jurnalistikasi asoslari, nutq san’ati, xalqaro madaniy aloqalar, Markaziy Osiyo tasviriy va amaliy san’ati tarixi, san’at nazariyasi hamda ilmiy tadqiqot metodologiyasi.