1961-yilda Tasviriy san’at fakulteti tarkibida “Kitob grafikasi” bo‘limi tashkil etildi. Uning shakllanishida Peking rassomchilik akademiyasida faoliyat yuritgan akademik Shirovskiy muhim rol o‘ynab, kafedraning ilk mudiri bo‘lgan.

1997-yilda O‘zbekiston Respublikasi Prezidentining farmoniga muvofiq Kamoliddin Behzod nomidagi Milliy rassomlik va dizayn instituti tashkil etildi.

2005-yil 4-iyuldagi institut Ilmiy kengashi qaroriga asosan “Xattotlik va miniatyura” hamda “Kitob grafikasi” kafedralari birlashtirilib, “Miniatyura va kitob grafikasi” kafedrasi tashkil etildi. 2022-yilda ushbu kafedra “Grafika” hamda “Miniatyura va xattotlik” kafedralariga ajratildi. 2024-yilda esa ular yana birlashtirilib, “Miniatyura va kitob grafikasi” kafedrasi qayta tashkil etildi.

Kafedrada bakalavriat va magistratura bosqichlari mavjud bo‘lib, ta’lim jarayoni yuqori malakali professor-o‘qituvchilar tomonidan davlat ta’lim standartlari asosida olib boriladi.

Kafedraning asosiy maqsadi — dastgohli va kitob grafikasi, xattotlik hamda miniatyura yo‘nalishlarida yuqori malakali rassomlarni tayyorlashdir. Ta’lim jarayonida Sharq va jahon badiiy an’analari asosida grafik, plakat va miniatyura san’ati rivojlantiriladi, badiiy asarlarning kompozitsion yechimi va g‘oyaviy ifodasi ustida ishlash ko‘nikmalari shakllantiriladi. Shuningdek, zamonaviy talablar asosida raqobatbardosh kitob va poligrafiya mahsulotlarini yaratishga qodir ijodkor mutaxassislar tayyorlash ustuvor vazifa hisoblanadi.

Kafedrada quyidagi fanlar o‘qitiladi: chizmatasvir, rangtasvir, rangshunoslik va kompozitsiya asoslari, grafika materialshunosligi, miniatyura materialshunosligi, grafika kompozitsiyasi, miniatyura kompozitsiyasi, grafika va miniatyura kompozitsiyasida badiiy yechim, kitob bezagining badiiy yechimi, grafika va miniatyura ashyolarida ishlash, grafikada an’anaviy uslublar, miniatyurada an’anaviy va zamonaviy uslublar, badiiy obrazning dinamik tasviri, badiiy muharrirlik uslubiyati, maketlashtirish, plakat san’ati, husnixat va xattotlik, eski o‘zbek yozuvi, kitobat san’ati, amaliy grafika, qo‘lyozmalarni o‘rganish, miniatyura san’ati tarixi hamda CG art.