2003-yilda “Informatika va menejment” kafedrasi tashkil etilgan. 2024-yil 13-avgustdagi institut Kengashi qaroriga asosan “Informatika va menejment” hamda “Ijtimoiy fanlar va jismoniy madaniyat” kafedralari birlashtirilib, “Ijtimoiy fanlar va informatika” kafedrasi qayta tashkil etildi. Hozirgi kunda kafedra Kamoliddin Behzod nomidagi Milliy rassomlik va dizayn institutining San’atshunoslik va muzeyshunoslik fakulteti tarkibida faoliyat yuritmoqda.

Kafedra art menejment yo‘nalishida malakali mutaxassislar tayyorlash, ularning kasbiy salohiyatini rivojlantirish hamda o‘quv, pedagogik, ilmiy-tadqiqot va tashkiliy-metodik faoliyatni amalga oshiradi. Shuningdek, kafedra institutning barcha tarkibiy bo‘linmalari bilan hamkorlikda ijtimoiy fanlar va axborot texnologiyalariga oid fanlarni o‘qitishni ta’minlaydi.

Kafedraning asosiy maqsadi — mehnat bozorida raqobatbardosh, zamonaviy bilim va ko‘nikmalarga ega, professional faoliyatda samarali ishlay oladigan, ijtimoiy faolligi yuqori bo‘lgan malakali mutaxassislarni tayyorlashdan iborat. Shu bilan birga, talabalarda iqtisodiy tafakkur, ijodiy yondashuv va zamonaviy axborot texnologiyalaridan foydalanish ko‘nikmalarini shakllantirish ham muhim vazifa hisoblanadi.

Hozirgi kunda kafedrada bakalavriat va magistratura bosqichlarida kadrlar tayyorlanadi. Ta’lim jarayoni kredit-modul tizimi asosida tashkil etilgan. Kafedrada quyidagi asosiy fanlar o‘qitiladi: art marketing, moliyaviy hisob, loyihalarni boshqarish, raqamli iqtisodiyot, kross-madaniy menejment, boshqaruv hisobi, mehnat muhofazasi va hayot faoliyati xavfsizligi, fandreyzing, media va kommunikatsiya, xalqaro art bozori va menejment, amaliy matematika, iqtisodiyot nazariyasi, biznes asoslari, akademik ko‘nikmalar, axborot-kommunikatsiya texnologiyalari, iqtisodiy tahlil, statistika, mikroiqtisodiyot, ekonometrika, menejment asoslari, tashkiliy xulq, sifat menejmenti, marketing, operatsion menejment, ilmiy tadqiqot metodologiyasi, ta’lim menejmenti va zamonaviy boshqaruv kommunikatsiyalari.