“Teatr bezagi rangtasviri” kafedrasi o‘z faoliyatini mustaqil kafedra sifatida 1997-yilda boshlagan. Ungacha ushbu yo‘nalish A.N. Ostrovskiy nomidagi Toshkent teatr va rassomlik instituti hamda Mannon Uyg‘ur nomidagi Toshkent davlat san’at institutida “Teatr rassomi” yo‘nalishi sifatida faoliyat yuritgan.

Kafedrada “Teatr bezagi rangtasviri” va “Filmning tasviriy yechimi” ta’lim yo‘nalishlari mavjud bo‘lib, 2017-yildan boshlab “Multfilm va kompyuter multiplikatsiyasi” bakalavr ta’lim yo‘nalishi ham yo‘lga qo‘yildi. 2025-yilda esa “Teatr bezagi” magistratura mutaxassisligi bo‘yicha kadrlar tayyorlash tizimi tashkil etildi. Hozirgi kunda kafedrada mavjud ta’lim yo‘nalishlari bo‘yicha bakalavr va magistratura bosqichlari to‘liq shakllantirilgan.

Kafedraning asosiy maqsadi — sahna badiiy bezagini yaratish, rekvizit va atributlar, personaj va liboslar, kichik va katta sahna makonlarini loyihalash hamda spektakl ishlab chiqarish jarayonigacha bo‘lgan barcha bosqichlar uchun badiiy yechimlarni ishlab chiqishga qaratilgan mutaxassislarni tayyorlashdan iborat. Shuningdek, badiiy, hujjatli, ilmiy-ommabop va animatsion filmlar uchun raskadrovka va eksplikatsiyalar yaratish, qahramonlar va makon obrazlari eskizlarini ishlab chiqish, film yaratish jarayonining barcha bosqichlarida rassom faoliyatiga oid loyihalarni amalga oshirish hamda talabalarda yuqori darajadagi badiiy mahorat ko‘nikmalarini shakllantirish kafedraning ustuvor vazifalaridan hisoblanadi.

Mazkur maqsadlardan kelib chiqib, kafedra teatr, kino va animatsiya rassomi sifatida chuqur bilimga ega, badiiy mahoratini amaliyotda qo‘llay oladigan yuqori malakali mutaxassislarni tayyorlashni o‘z oldiga asosiy vazifa qilib qo‘ygan.

Kafedrada quyidagi fanlar o‘qitiladi: chizmatasvir, rangtasvir, rangshunoslik va kompozitsiya asoslari, teatr rejissurasi, kino rejissurasi asoslari, multiplikatsiyada rejissura asoslari, teatr bezagi kompozitsiyasi, kino kompozitsiyasi, animatsiya kompozitsiyasi, multiplikatsiya kompozitsiyasida badiiy yechim, animatsiyada tasviriy harakat asoslari, ashyoda ishlash va maketlashtirish, sahna texnikasi va texnologiyasi, kino dekoratsiyasini loyihalash texnologiyasi, rangtasvir texnikasi va texnologiyasi, badiiy bezakli chizmatasvir, badiiy bezakli rangtasvir hamda multiplikatsiyada kompyuter grafikasi va zamonaviy jarayonlar.