1945-yilda Toshkent shahrida Markaziy Osiyo davlat teatr san’ati instituti tashkil etildi va 1948-yilda unga rus dramaturgi A.N. Ostrovskiy nomi berildi. 1954-yilda mazkur institut qoshida tasviriy san’at ta’lim yo‘nalishlari yo‘lga qo‘yilishi natijasida Toshkent teatr va rassomlik institutida akademik badiiy ta’lim joriy etildi.

Ushbu dargoh nafaqat O‘zbekiston, balki butun mintaqa uchun muhim ta’lim markaziga aylandi. U Markaziy Osiyoda tasviriy san’at rivojiga sezilarli hissa qo‘shib, ko‘p yillar davomida hudud uchun malakali mutaxassislar tayyorlash vazifasini mas’uliyat bilan bajarib keldi.

1954-yilda Teatr san’ati instituti qoshida tashkil etilgan tasviriy san’at oliy ta’limi mamlakatimiz tasviriy san’ati taraqqiyotiga katta ta’sir ko‘rsatdi. Bu jarayonda R.A. Ahmedov, O.K. Tatevosyan kabi taniqli rassomlarning xizmatlari alohida e’tiborga loyiqdir. Shuningdek, ushbu fakultetni tashkil etishda I.E. Repin nomidagi rangtasvir, haykaltaroshlik va me’morchilik instituti bitiruvchilarining hissasi katta bo‘ldi. Ularning aksariyati 1953-yil bitiruvchilari bo‘lib, 1954-yildan boshlab mamlakatimizda oliy badiiy ta’limni rivojlantirishga faol jalb etildi.

Institutda rangtasvir kafedrasining tashkil etilishi keyinchalik boshqa ixtisoslashgan kafedralarning ochilishiga zamin yaratdi.

Institutga ilk qabul 1954-yilda amalga oshirilib, birinchi bosqichga 22 nafar talaba qabul qilindi. 1960-yilda esa ilk bitiruvchilar yetishib chiqdi. 1956-yilda rangtasvir yo‘nalishi ikki ixtisoslikka — dastgohli rangtasvir va teatr bezagi yo‘nalishlariga ajratildi.

Kafedraning dastlabki pedagoglari sifatida O.K. Tatevosyan (kafedra mudiri), R.A. Ahmedov va V.A. Riftin faoliyat yuritgan. Keyingi yillarda esa A.A. Godetskiy, V.A. Riftin, Ch.G. Axmarov, A.A. Goldrey, P.A. Yurovskiy, P.P. Matsexa, K. Saloxitdinov, T.P. Reshetnikova, B. Shupak, V.P. Sosedov, V.I. Jmakin, G.A. Vizel, A.P. Perov, V.A. Nechaev, G.V. Moiseev, V.L. Jdanov kabi ko‘plab yetuk rassom-pedagoglar faoliyat olib bordilar.