O‘zbek tili va ijtimoiy fanlar kafedrasi

1999-yilda Kamoliddin Behzod nomidagi Milliy rassomlik va dizayn instituti tarkibida “Tillar va adabiyot” kafedrasi tashkil etilgan. Dastlab San’atshunoslik fakulteti tarkibida faoliyat yuritgan mazkur kafedra keyinchalik institut miqyosida barcha fakultet talabalariga xizmat ko‘rsatuvchi umumta’lim kafedrasi sifatida qayta tashkil etildi. Institut Kengashining qaroriga asosan, kafedra bevosita o‘quv va tarbiyaviy ishlar bo‘yicha prorektorga bo‘ysundirildi. 2020-yilda esa kafedra nomi “O‘zbek va xorijiy tillar” kafedrasi deb o‘zgartirildi. Hozirgi kunda kafedra San’atshunoslik va amaliy san’at fakulteti tarkibida faoliyat yuritmoqda.

Kafedraning asosiy maqsadi — talabalarning ijodiy, ma’naviy va madaniy saviyasini oshirish, ularda o‘zbek, rus va xorijiy tillarda og‘zaki hamda yozma nutq ko‘nikmalarini rivojlantirish, shuningdek, imlo savodxonligini mustahkamlashdan iborat. Shu bilan birga, talabalarni jahon va o‘zbek adabiyotining eng sara namunalari bilan tanishtirish ham muhim vazifa hisoblanadi.

Hozirgi kunda kafedrada bakalavriat bosqichida ta’lim berilib, o‘quv jarayoni kredit-modul tizimi asosida tashkil etilgan. Kafedrada quyidagi asosiy fanlar o‘qitiladi: xorijiy til (ingliz tili), o‘zbek tili, rus tili, jahon va o‘zbek adabiyoti tarixi, o‘zbek adabiyoti tarixi.